La toñá

Los airis fríus d’estus días ya mos anuncian que se vai el veranu (enque pahi que le cuesta!). La demuación trai la sotra estación, que llamamus otoñu, atoñá o toñá.

Enque el tiempu nuevu no despela las ramas delos penenis belloterus dela hesa, la yerva prencipia a ahormal un mantu verdi que arropa las raízis delas anzinas, los alcornoquis i los mestus. Las billotas ván rindiendu-si – o atoñandu-si – i las setas ván ansomandu la cabecina.

Enas sierras i vallis del norti d’Estremaúra, ondi el paisagi es más bravíu i no domina la hesa, sí se puein almiral los tonus coloraus i amarilluchus que ván pintandu las cogollas delos castañaris i las robreas. Enos passeus, callis i praças delas cidais i los puebrus, los pratanerus i desotrus arvus folasterus tamién destiendin la su alfombra parda enos enceraus.

Valli'l Ambrós
Valli’l Ambrós

L’atoñá es cañega palos frutus del tiempu comu son las castañas, las nuezis, los higus, los bembrillus, los piñonis, las granás, las almendras, las alvellanas, las uvas, las mançanas, las naranjas, las tanjarinas, las peras o las calabaças. Se comin enas abondas fiestas que se celebran estus mesis, en que tamién se bichan dulçainas comu los uessus de santu, los ducis de bembrillu i los prestiñus; hueraparti delos carvotis (castañas assás) i los casamientus (que consistin en pelal la nues i meté-lla endrentu un higu passu).

carvochá
Carvotá, carvochá o magostu

A tentu la religión, los estremeñus cristianus celebran los Tossantus el primeru de noviembri, quandi es costumbri acordal-si delos dehuntus. Amás, en Torrojonzillu se festeja la Encamisá i en Xarandilla los Escobazus, dambas a dos el 7 diziembri.

Los más gentilis se recuerdan delos antigus diosis i vén enos dissantus moernus los ecus delos festivalis delos puebrus de patrás. El nuestru Halloween, la chaquetía chiquitía, atestiga la parientencia delos nuestrus rehuíjus conos delas gentis d’antis dela cristiandá. Tamién mos acompara con otrus puebrus ibéricus i uropeus, que celebran estas fechas con costumbris aparentis.

Si la primavera es la nacencia la tierra i el veranu la moceá, la toñá es la descadencia que antecedi la muerti ivernal. Bienllegaus alos esperezus enantis del sueñu la Tierra Madri.

 

 

 

Huenti dela retrataúra prencipal

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s